Wortschätzle 94 - A gscherdr Graddlr ond zu viel Sonn

1
Der angeblich gefährliche Hund!
Mid’m Hiadle häd’r koin Sonnastich griagd – sei Wei duad mr leid.

Kaum isch a baar Dag hoiß, scho jammern d’Leid widdr, dass so a Hitz hod. Isch hald so, irgend oim isch immer ned reachd. An dem bollahoißa Sonndig war mer mid’m Hund ondrweags. An da Mandichosee hod’s ons drieba, damit dr Hund au ens Wasser ko, sich a weng abkiala. Kaum dort, dr Hund war scho em Wasser, hod er zwoi Schwän gsea und isch deane nochgschwomma, scho kaifd’s von unda vom Kiesschdrand hoch auf da Damm, dass mr da Hund zrigg holla solln, sonschd zeugd dr uns an – d’Schwän dirfed do wohl bada, dr Hund anscheinend ned. Des gscherde bayrische Mannsbild midm grausiga Dialegd, am faldiga, labbriga Ranza, der eam ibr d’Badhos ghanga isch ond Männerduddla, dia au scho lang ondr dr Schwerkraft leided, isch richdig ausgschamd ond uflädig wora. Droht mid dr Bullerei ond ra Anzeug, wenn mr da Hund ned glei an d’Leine nemmad. Der Grasdaggl der bayrische, genau, d’Fias wared au wedr schee no grad, hod von am freindlicha „Bidde“ sicherlich no nia ned was gherd. Abr sei alds vrgammleds ond agschimmleds Brod, des er vermudlich nemme beißa ko, des duad er an de wilde Schwän verfiddra ond glaubd, des duad dene au no guad. Der domme Soichr – mir Schwoba kenned au schimpfa ond dirfed des au – i hoff, dia weiße Viechr schnapped amoal kräfdig nach deam gscherda Hamml, der beschdimmd an Sonnaschdich ghed hed. Der häd a Hiadle aufsedza solla.
Sei Wei isch ganz ruhig drneaba ghogged, vrmudlich hod se sich granadamäßig gschämd, fr iren ughobelda, alda Siach, deam se heid obed no’s Bier ausm Keller hola muas, drweil er gschdinged ond ugwascha vorm Fernseh hoggd ond
ruasled. Dia arme Frau muas am nächschda Dag sichr freindlich „Guten Morgen“ zu eam saga. Drhoim isch der sicher au so a grandigr Graddlr – dia Frau duad mr echd leid.
Mr hend ons ned lumpa lossa ond hend da Depp au ebbes ghoißa – send abr, vors Briegl ond a Fodzn fr eam gea hed, ganga.
Wenn des mei Muaddr zom lesa griagd, griag i Schimpf: „Bua, des kosch abr ned in d’Zeidung doa.“ Doch, i dua’s!
3
Diesen Autoren gefällt das:
Lesen Sie auch die Bildkommentare zum Beitrag
1 Kommentar
4.574
Sebastian Summer aus Aystetten | 31.05.2017 | 16:25  
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.