Wortschätzle 99 - Dr Schwob „on tour“ im Ländle

Sterben schwäbische Rituale und Eigenheiten aus? I glaub’s ned – nianed!

Noch deam viela Rega, der mr an großa Doil von meine Tomada em Gärtle hod bladza loa, ond dene saggrisch hoiße Deg isch’s am Samsdig ans Schwäbische Meer ganga. A Ausfligle ins Ländle, um a neis Heiligs Blechle auszbrobiera – sche isch’s gfahra. Von Augschburg isch’s durchs Schwäbische nom ens Württabergische ganga, vorbei an dem Heiliga Berg der Westschwoba, dem Bussen, auf deam ma au von dr Ferne des kloine Wallfahrtskirchle drauf erkenna duad. Ja, dia Schwoba do driba hend dort au so an Berg, ned bloß mir hier bei ons, dia mr ens Bayrische nom miassed, um nach Andechs auf dean Heiliga Berg zom komma.
Zom Bodasee hi isch’s dann midm Verkehr doch a weng digg wora, mr hod gmoind, elles was ned in Urlaub hod fahra dirfa, isch Richtung Meersburg ondrweags gwea. Elles solche Loimsiadr, dia frier mit Waggldaggl ond dr umgheggleda Klobabierrolle henda auf dr Huadablag ondrweags gwea wäred. Heidzdag sigd ma dia Addribute dr Langsamkeit ja kaum mea. Abr eigedlich hädded dia ja eh drhoim em Hof standa miassa, om ihr Heiligs Blechle zom Wascha, Wachsa ond Boliera. Abr so war’s id, elle sends an da See gfahra, wia mir – isch des Autowascha am Samsdig aus dr Mod komma, i ko’s ja kaum glauba. Dr brave Schwob hod so seine Rituale ond dia gibd’r doch nianed auf, so wia d’Hausordnung onds Hof- ond Trottwarkehra. Des schdirbd doch gwieß ned aus. Endlich in Überlinga war’s dann wirglich schea, d’Wolga hend Sonn rausblinzla loa, dr Wind hod a wengele aufgfrisched ond Leid ward guad drauf.
Do drunda hod ma echd des Gfial, ma isch em Urlaub – oifach schee. Es war bloß schad, dass mr bloß oin Dag ghabd hend, om Freind dort zom bsuacha, dia do in dr Nä grad auf Urlaub send.
Fahred au moal widdr an Dag an de See na, des duad au ui guad.
Negschde Woch gibd’s des 100. Wortschätzle, moal schau, was mir do drfir eifälld.

Alle weiteren Wortschätzle finden Sie hier.
3
Diesen Autoren gefällt das:
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.