Wortschätzle 111 - Ond i hab widdr koi Lämmlaform koffd

Karwoch – Oir färba ond von de Rätscha ausm Schlof schregga.

Stefan Gruber


Hand aufs Herz: Wer isch den Sonndag zledschd ausm Bedd komma, am Palmsonndag? Wer isch dr Palmesel des Joar wora? Na machd ja nix, hod ja koine Konsegwenza, koinr muass deswega a Joar lang abdroggna odr da Müll nausdraga. Oder gab’s do in irgendwelche Familia bsondere Sidda? I kenn koine. Am Palmsonndag weared neie Palmkädzlazweig en dr Kirch gweid, drnoch schdegged ma se em Hergoddswingl henders Greiz. Manchmoal abr au zwischa de Chrischdus ond de Holzbreddla vom Greiz – so hendr de Erm ond ens Holgreiz. Hod do oinr dra dengd, dass eam des au weh dua kennd? Noi! Dia Palmkädzla solled dann ’s Joar ibr ’s Beese ond ’s Oweddr vom Haus abhalda.
Abr dia Woch isch Karwoch, dia ledschde Woch dr Faschdazeid. Ab Freidag Nachmiddag send Kirchaglogga widdr ondrweags auf Ausflug nach Rom, drweil ibrnemmed Rätscha des Gschäft ond mached richdig Lärm, bis d’Glogga zur Auferschdehung wiedr da Dienschd aufnemmed. Abr dia Woch wered erschd amoal
Oschdroir kochd ond gfärbd, oder gar Oschdrlämmla bagga. Ond i hab mir wieder koi Fermle fir a Lämmle bsorgd – a ganz Joar häd i drzua Zeit ghabd. Aber des Joar koff i mr oins auf dr Duld, dia fangd ja kommeds Wochaend au widdr a. Also dradenga: Oschdroir färba, Schogladhasa kaufa, Lämmla bagga ond Neschdla macha.
2
Diesen Autoren gefällt das:
1 Kommentar
6.897
Sebastian Summer aus Aystetten | 27.03.2018 | 15:20  
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.