Wortschätzle 105 - Dr Schwob isch schwach wora

(Foto: Ivana Pendragon 123rf)
De erschde Lebkucha san gessa, sie schmegged heir wia ledschds Joar.

Stefan Gruber

I gib’s zua, i hab mi hireiße lossa, hab mi im Subbrmargd von de Sondrverkaufschdella alogga lossa. I bin schwach wora. I hab mir an Karton von deane billige Lebkucha, deane dungle Brezga, Herzla ond Schdera in Schoglad koffd. Seid Sepdembr hab i mi zammgrissa – jedzd war Schluss. Scho em Audo hab i dr Kardon aufgmachd, d’Folie aufgrissa ond ind erschde Brezg neibeißa wolla ond dann hab i gsea, dass d’Schoglad aglaufa war, so leichd grau. Neibissa hab i drodzdeam, dr Gschmagg isch heir dr gleiche wia vorigs Joar: ’s gibd bessre. I hoff ja, dass d’Lebkucha wenigschdens von deam Joar gwea send. Irgendwia muass ma sich ja aufs bevorschdehende Feschd eischdimma, ond ned bloß dia Deg zwischa de halbaufbaude Hiddagrischd vom Chrischdkindlesmargd aufm Augschburger Radhausbladz durchlaufa ond denka: Isch scho widdr so weid? Von de Schdrossabeleichdunga hänged au schon de erschde Schdera an de Heisr, abrs Joar isch doch no ned rum? San doch no oinahalb Monad bis Weihnachda ond faschd zwoi bis Silveschdr.
Abr des Sauweddr holld oin glei widdr ind Realidäd zrick, kald isch’s, nass, windig – oifach zwiedr. Do gosch besser hoim, wisch dr d’Regadrobfa aus dr Brill ond machsch dr obads an hoißa Moschd ond mummelsch di ei ind Wolldegg. Herrschafd na, ’s isch grad wiaschd draußa.
1
Einem Autor gefällt das:
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.