Wortschätzle 110 - Sauergraud gibd’s, wenn’s kald isch

Oifach guad, selbstgemachte Schupfnudeln mit Kraut, Bödele und Blutwurst.
Selbrgmachde Schubfnudla kenned a Feschddagsessa sei.

Stefan Gruber

Mer brauched ons ja echd ned aufrega, bloß weil’s nomml kald wora isch. Es isch erschd Midde März vorbei, bis Oschdra isch no a Weil ond dia kald Soffi isch no lang ned rum.
Also han i was mid Sauergraud gmachd – bassed zom kalda Weddr. Schubfnudla, abr richdig schwäbische, selbrgmachde ond ned dia ferdige ausm Kiahlregal im
Subbrmargd hoiß gmached, dia so blass end Folie eigschwoißd san ond au auf de Märgd an de Imbisswäga so gschmagglos, digg ond doiged als „Schupfnudeln mit Kraut“ vrkaufd weared. A eachdr Schwob, der’s no richdig kenna duad, der schiddled da eh bloß dr Kobf ibr dean neimodischa Bfusch.
Also richdige, selbrgmachde Schubfnudla aus Roggamehl han i gmachd. Ich mach se bloß aus Roggamehl, andere duan Woizamehl drzua, manche halb ond halb odr sogar blos a Driddl Rogga, dass de Nudla ned so schwear em Maga flagged – je nach Guschdo – bei mir geid ses pur.
800 Gramm Mehl wareds, do hab i mer widdr a Arbed aufghalsd, a Schdrofarbed wia fr welche, dia Vaddr ond Muadr drschlaga hend – so said mei Muadr allwei. Abr mit frisch gwaschne Händ ab ans Werg, dungl weared d’Nudla vom Roggamehl eh. I han bloß kurze Nudla gmachd, also bloß zwischa de Hend grolld, gschubfd. Ma ko se au aufm Nudlbredd macha ond lang, a vierdl Meddr isch koi Gschefd ned. Dann em Salzwassr kurz kochd ond in Buddr-schmalz gschwengd, agreschd. Em Sauergraud hab i a Bedele mitkochd, a baar Wacholdrbeara ond Lorbeerbläddr. Drzua hab i no a Bluadwurschd ohne Haud en Scheibla gschnidda ond en dr Pfann rausbroda, richdig agreschd. Dia Kombination dungle Schubfnudla, Sauergraud, brodne
Bluadwurschd ond Bedele hod mi sogar fr da Schnea endschädigd, den’s am Samsdig Nachd herghaua hod – ond elle hod’s gschmegged.
En dr Erinnerung: Mei Großmuadr hod an Neijohr fr elle Schubfnudla gmached, i glaub mr wared sieba Leid zom Essa. Ond fr elle hod se dr ganz Vormiddag d’Nudla gschubfd – a Sau-gschäfd – heid no a ganz herzlichs „Vergeld’s Godd“ drfir, fir des Feschddagsessa. Domoals hab i no gar koi Sauergraud gessa, bloß de naggede Nudla, hab abr au drnoch koine Probleme mid de Fladulenza ghed.
0
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.