Wortschätzle 112 - Da hosch da Dregg em Schechdele


A Bsuach auf dr Dult ko fir manche Familie aschdrenged sei.

Stefan Gruber

Noch em Middagessa aufd Dult, des isch am Sonndag a guadr, kloinr Verdauungsschbaziergang. Ond, was mi gwundred hed, es war gar ned so voll. Wennd a guads Middagessa ghabd hosch, dann isch dr Gruch von deane Brodwirschd ned wirglich a Genuss – abr viele Leid hend se gschmegged. Luschdig isch dann scho, wenn so a Familie aus Muddr, Vaddr ond drei gloine Grodda am Siaßigkeidaschdand schdanded, ond jede von deane Gera zabbled ond ebbes anders will. De oi brannde Mandla, de nägschd Popcorn ond de dridd Zuggrwadde, ond no a Lebkuachaherz, ond no Guadsla...
Es isch ja schee, wenn ma mid de Kendr aufd Dult god, abr dass solche Probleme gibd, zom Schluss jeds von de drei Mädla bleared ond zanned send, jede schmolled, weils hald ned elles griagd hend ond dia Mandla dann gar hend doila missa. D’Muddr hod de Kloinschd an dr Hand drvo zoga, dr Vaddr hod brilled – vil hods ned brochd ond i hab mr dengd, jungr Vaddr, des hosch davor gwussd, auf was dr Nochmiddag nauslaufd: schlechde Laune, drei blearede Kendr ond a grandige Frau. Jedzd hosch dr Dregg em Schechdele. Jedzd kosch no jedr was egschdra kaufa, dann isch dr Nochmiddag vielleichd gredded.
Ibrigens, an da schwäbische Ausdrugg „da hosch da Dregg em Schechdele“, „das selbst verschuldete Ärgernis“ hab i scho lang nemme denga missa, bis mi a Wortschätzle-Leser kirzlich dra erinnred hod, ond ’s edzd gnau fir dean junga Vaddr auf dr Dult bassd hod – vergeld’s Godd.
2
Diesen Autoren gefällt das:
1 Kommentar
Stefan Gruber aus Augsburg - City | 13.04.2018 | 12:12  
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.