Wortschätzle 124 - So kosch em Windr d’Sonn schmegga

Ob rode, runde, eirige odr au gelbe ond greane Tomada, aus elle ka ma Soß macha. Basilikum ond Sablei ausm Garda drzua, mid Olivaeel, Salz, ra Bries Zuggr ond Pfeffr em Dopf aufkoched, kloi gmached mid em Zaubrschdab, durchs Sieb gschdricha ond kald dann eigfrora. Do kann ma em Windr dann dia sonnagreifde Frichd als Soß odr Supp genießa - lossds es eich schmegga.

Eimacha odr eifriara? Edzd isch Zeit, fir da kalde Windr zom Vorsorga.

I wois ja garned wo i den Eiwegggummi her hab, der in meiner Gruschdschublad in dr Kiche romgammled isch, abr er erinnerd mi dra, dass ma frier elles ei-gweggd hod. Erschd amoal hod ma d’Gläsr schbiala missa, dann des kochde Obschd odr Gmiaß, au Fleisch en d’Gläsr einschichda missa ond dann dr Gummi ibr da Rand ziaha. Dr Glasdeggl drauf, d’Eiweggklammer dribr ond dann endwedr en da Eimachdopf mit Dermomedr em Deggl mit Wassr drin gschdelled odr em Backofa, wenn’s mehr Gläser wared. Dann hod ma dr Dobf hoiß gmached, ’s Zuig dren aufkoched ond noch re ganza Weil konnd ma d’Gläsr abkiala lossa ond dann meischd em Kellr ens Regal doa. Fir dia Gläsr em Backofa gald’s Gleiche.
Heidzdag isches oifachr, da kochsch des Zuig, losch es abkiala ond dann duasch es en Blaschdiggschdaddla abfilla, machsch se zua ond dann kommed se end Gfriere, do hälds dann aber au faschd ewig, koschd de Schwob hald Schdrom.
Ond edzd isch Zeid zom Eimacha. Des Joar han i Gligg ghed ond meine viele Tomadabflanza en meim Gärdle san echd schee wora ond draged guad, ned so wia ledschds Joar, wo mr de meischde Tomada am Schdrauch vrgammled send, wega deam viela Rega – des Broblem hend mr des Joar ja ned. Alle drei Deg ko i Tomadasoße eikocha fr da Windr, odr bloß gloine Tomada-schdiggla en gloine Portiona eifriara zom Kocha. Do kosch dann em Windr d’Sonn schmegga, en der Tomada reif wora san. Mei, i frei mi drauf.
4
Diesen Autoren gefällt das:
1 Kommentar
506
Katharina Wieser aus Augsburg - City | 13.08.2018 | 19:14  
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.