Wortschätzle 129 - Ohne Schdrom bisch aufgschmissa

A selbrgmachde Aprikosenmarme isch ganz lecker. (Foto: Symbolbild sergeybogachuk 123rf.com)

Marmeladenproduktion unter erschwerten Umständen.

Auf so am alda Herd, der mit Holz aghoizd wora isch, so oinr mit Ring zom rausnemma je noch Dobfgrease ond mid Schiffle, hab i ja scho koched, abr a moderner Induktionsherd isch scho a scheener Luxus – wenn elles guad duad. Aber edzd häd i gern so an alda Herd ghed – vorausgsedzd du hosch gnua Holz zom Aschiera ond Hoiza. I hab a ganze Schdeig guade reife Aprikosa griagd ond so was loßd ma ned vrkomma, abr midda beim Kocha hab i bledzlich koin Schdrom mea en dr Kuche ghed, bin em Dungla gschdanda, nix mea isch ganga, koi Liachd ned, koi Induktionsfeld mea, gar nix – dr Reschd dr Wohnung hod an Schdrom ghed – was fir a Huraglomb, die Technik. Ond i ben grad vorm Dobf mid dr kochada Marme gschdanda, d’Gläsr warn scho hoiß ausgschbialed ond elles ferdig zom Abfilla. Also hab i als erschds a Vrlängerungskabl gsuached ond drmid em Kialschrank mid em Gfrierfach vom Gang aus widdr Schdrom gea. D’Sicherunga von dr Wohnung wared ja elle drin – koin Grund fir da Schdromausfall en dr Kuche hab i gseha – elle Elegdrosacha hab i ausgschdegged, nix isch bassierd. Dann, em Halbdungl mit a weng am Liachd vom Flur hab i d’ hoiße Marme abgfilled. Gschimbfd hab i gnua, ond dia bluadige Hennagrebf, dia i ragfluched hab, weil i mr d’Finger mid dr hoißa Marme vrbrennd hab, hend au nix brochd.
Als elle Gläsr voll wared ond umgschdirzd aufem Kuchedisch gschdanda send, da hab i d’Sicherunga fird Wohnung em Keller kondrolliered – brombd war do dia fird Kuche raus, i hab se widdr nei ond dr Schdrom war widdr da, als ob nia was gwesa isch. I hab drnoch hald mea budza missa als soschd beim Marme Kocha. Em Dungla filld sich d’Marme echd schlechd ab. Häd i bloß frier drei Schdogg diafr em Keller nachgugged, i häd mir Griffel ned so vrbrenned – vrregg Dodle, so a nixeds Glumb.
1
Einem Autor gefällt das:
2 Kommentare
1.724
Enrico Baumann aus Augsburg - Süd/Ost | 19.09.2018 | 08:51  
Stefan Gruber aus Augsburg - City | 20.09.2018 | 14:36  
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.