Wortschätzle 131 - Mr send zom Riabaglaua ganga

Heidzdag muasch ja suacha, bis iberhaubd a Feld mit Riab findsch. Da muass ma dann hald doch Kirbis nemma. (Foto: semmikphoto 123rf.com)

Frier hend mer grausige Riabagoischdr gschnidzd.

En de Subbrmärgd hod ma en de vrgangene Wocha ja albod vill Zeig zom Grusla gseha, Mäschgerla fir Hexa, Larva fir Monschdr ond oinzelne siaße Auga ond ab-gschniddne Fenger zom Essa, klaffede Wunda mit Oidr ond Bluad zom Aufkleba - 's amerikanische Halloween. A weng weniger auffällig send Kondidora, dia siaße Seelabrezga en de Schaufenschdr ond de Auslaga hend, mit ond ohne Schogladibrzug, mid Marzipanbluma drauf ond Zuckerverzierunga odr ganz selda au bloß aus Heffadoig ohne Bemberles drauf ond dra - damit ma vo seim Dodle a Seelabrezg an Allerseelen, dem 2. Novembr, griaga ko - abr der Brauch nimmd emmer mea ab - leidr.

Frier, als mer vo Halloween no nix bei ons gwussd hod, mer no koine Denz drom rom gmached hod, da send mer kurz vor em 31. Oktobr an d'Feldr naus gradled ond hend de Baura a baar Sau- ond Zuggrriaba gschdola, drhoim hend mr dann gruslige Riabagoischdr gmached. Des isch koi Brauch ned, dens blos bei ons gea hod, aber em Süddeidscha war's doch rechd weid verbreid. Em schwäbischa Bad Buchau solls gar an Riabagoischdrumzug geba.
Mer hend als Kendr mid am Messr des obere Doil von dr Ruab wia an Deggl agschnidda ond dann mit Messr ond Leffl dia Ruab ausgradzd, irgedwia leer gmached.

Dann send a Nos, zwoi Auga ond meischd a zahluggeds Maul neigschnidzd wora. A Kerzle isch neikomma ond mir hend da Deggl widdr draufgsedzd. Wenns dungl wora isch, hend mr dia beleichdede Riabagoischdr ens Fenschdr gschdelled. Mr hend domoals fir so an Schbaß koine Kirbis ned brauchd. I will koin zom Riabaglaua aschdachla, aber schee ond schbanned war's drodzdeam. Ond en manche Gegeda send Kendr ohne Verkleidung mit de leichdede Goischdr obeds von Haus z'Haus ganga, hend a Sedzle aufgsaged ond manchmoal was Siaß griagd: "Mir san de Riabagoischdr, ..."

3
Diesen Autoren gefällt das:
3 Kommentare
8.053
Sebastian Summer aus Aystetten | 31.10.2018 | 16:12  
Stefan Gruber aus Augsburg - City | 31.10.2018 | 16:25  
8.053
Sebastian Summer aus Aystetten | 31.10.2018 | 16:46  
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.