Wortschätzle 134 - Au wenn d’Sahne an Schdich hod

Wenn von deam scheena Biffe was ibrig bleibd, dann paggds dr Schwob in seine midbrochde Blaschdigdosa ei ond nemmd mid was god - fir de negschde Deg - verkomma lossed mer nix! (Foto: Symbolbild rawpixel 123rf.com)
Wenn d’Reschdla vom Biffe en de Blaschdigdosa verschwinded.
 
Dr Schwob an sich lossd ja nix vrkomma ond was zahld isch, des wird au gessa – liabr da Maga verrengd, als em Wird was gschengd. Abr wia isch des, wennd eiglada bisch, zu Feschdla, wo ma ebbes zom Essa midbringa soll?
Manche brenged allweil s’Selbe mid, die oine, ma kennd ja edzd Erz-Schwoba zu dene saga, die da Gurgasalad midbrenged, denn der isch am billigschda ond schnellschda zom Macha. Andre mached Donauwella fir da Kaffee a weng schbädr. Wennd Hausherre guad organisierd hod, dann isch von allem ebbes do, Vorschbeis, Salad, ’s Haubd-essa hend Gaschdgebr an-gschaffed, ond dr Kuacha kommd au vo de Geschd.
Wer edzd an dem Samsdig obed scho zfria vom Feschd hoim god, weil d’Schdimmung so lädsched isch, oder aus irged am andra Grund, der muass am nägschda Dag selbr kocha. Wer a guads Sidzfleisch hod ond längr bleibd, zumindeschd bis s’Biffe abgreimd weard, der sigd allwei de gleiche Pappaheimr, dia dann mid de Blaschdigdosa ond Schachdla – i han zufällig no a Dos em Audo ghed – doschdanded, ond „’s muass ned sei, abr von deam do nemm i au no a bissle was mid, ned so vill, a dua doch no an Leffl voll drauf“. Wer’s gschiggd aschdella duad, der hod zledschd von dr Vor-schbeis, ibr da Saubroda bis zur franzesischa Schogladgreem elles beianand – wurschd ob en oinr Schissl, weil „bis drhoim gods scho“ odr „weil em Maga kommd eh elles zam“ oder wenn se ganz guad organisiered send en verschiedene Schissla ond Bixa. Ond dr Kuacha fend allwei oin, der se firn obfred, au wenn d’Sahne vom ledschda Dordaschdiggle scho dr Obed ibr langsam so a weng an Schdich odr an gelba Rand griagd hod … abr was will i eich saga, ihr kennd des ja, allwei send’s de gleiche, die nia ned was midbrenged außer leere Schissla ond mid Essa fir zwoi Deg hoim ganged – weil, des ko ma doch id wegschmeißa, woandersch ....
Mir hend vill Schbaß ghed de ledschde zwoi Wochaend beim Läschdra iberd andre Feschdgeschd, drom god ma au erschd zom Schluss, do ko ma ibrige Donauwella eisagga ond kaum oinr griagds mid ond ma werd id s’Obfr vom Gschwädz vo de andre – abr bei ons isch des ja elles ganz andersch ond als Schwob said ma ja nix, ma schwädzd ja bloß.(Stefan Gruber)
2
Diesen Autoren gefällt das:
1 Kommentar
8.289
Sebastian Summer aus Aystetten | 20.11.2018 | 15:50  
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.