Wortschätzle 136 - Zwoi Schbidz ond schdolz drauf

Dr Ferdinand mid seine zwoi Schbidz, war so draurig ond isch von de andre Chrischdbaim ausglachd wora. (Foto: Peter Berens)
 
Dr Max hod mid dr Eiseba gschbield ond dr Ferdinand war dr gligglichschde Chrischdbaum iberhaubd. (Foto: Peter Berens)

Weihnachdsgschichdle / Wia a gloiner, schiachr Grischdbaum au no a schees Weihnachda ond a guads Hoim griagd.

Dr Ferdinand, a klois Chrischdbaimle, hod grausig gwoind, gschluchzd ond bleared, es war scho dr 24. Dezembr. Wia dia vier Wochaenda drvor send de ledschde Deg d’Leid am Ferdinand vorbei glaufa, hend dean gloina Grischdbaum id gseha odr gar ausglached: „Schau amoal wia schebs“, „Luag, wia grumm der gwachsa isch“. Ibr de andre hend sich d’Leid gfreid, hend Schroi doa, „ui wia schee, schau der isch grad, der isch guad“. Es hod eam ganz ferdig gmachd.

A Zweigle fehld

Seine Kollega wared faschd elle groß, ganz gleichmäßig gwachsa, hend gschdrozed vor Grafd ond am End vom Dag wared se vrkaufd. Aber er ned. Auf halber Hehe hod eam a Zweigle gfehld ond a baar Nodla send eh scho abgfalla gwea, sei Schdamm war a weng grumm – aber ned schlimm, hod er gmoind. Urschbringlich war er ja a bissle schdolz auf seine zwoi Schbidz, weil, da wo er gwagsa isch, elle um eam rum bloß oin ghed hend. Beim Ferdinand war dr oi Schbidz a weng längr als dr andr. Abr edzd, wo er wia all dia andre abgsägd ond aufgschdelled vor deam Subbrmargd auf an Keifr hod warda missa, da hod er gmergd, dass des gar ned so toll isch, zwoi Schbidz zom haba. De andre Weihnachdsbeim hend deswega so auf eam rundr gschaugd, hend eam ausglached, dass er ganz draurig wora isch, ganz debressiv, er hod kaum mea seine Zweigla oba halda kenna. Wenn de Ferdinand oinr end Hand gnomma hod, dann bloß um eam auf d’Seide zom schdella odr er hodn oifach ausm Weag greimd, um de andre besser zom seha.
Neimed hod eam haba wolla. Er war ganz verzweifled – hod Angschd griagd, dass er ibrig bleibd ond was dann wohl mid eam bassiered – es war ja scho dr 24. Dezembr ond scho bald dämmrig, de meischde Leid hend ihre Chrischdbaim ja scho lang drhoim, abr dr gloi Ferdinand schdod allwei no da.

„Dean kauf mer!“

Dr Lada hod scho langsam zamgreimd ond scheane Baim wared eh koine mehr da, da isch no a Ma mid am Biable, em Max, komma. Ond dr gloi Max isch glei auf da Ferdinand zu-gschdobsled, auf am Weag gschdolbred ond gfloga. Abr irgendwann hod er eam am Schdamm gnomma ond zom Baba gsaid: „Der isch schee! Dean kauf mer!“
Dr Vaddr hod mid de Auga grolled, hod de Ferdinand ja garned haba wolla. Mit seim Meddrzwanzg war er eam zgloi, zgrumm ond die zwoi Schbidz … des god ja gar ned. Er wolld eam widdr zrigg schdella, abr dr Bua hod so Denz gmached, so rumbefzged ond brülled, dass dr Vaddr ’s Baimle gnomma hod – bloß dass a Rua isch. Dr Bua hod sei Baimle ghed.
Vordoil war, er hod eam billigr griagd ond er hod ens Audo nei bassd. „Baimle“, hod dr Vaddr gsaid, „bei ons muasch fei längr halda als bis Dreikenig, bei ons schdosch bis Maria Lichtmess, ond wenn’s aufm Balkon isch – egal wia d’ ausschaugsch!“

A Grischbele

D’Muddr drhoim hod bloß glached ond gsaid: „Au so a schiachs Grischbele von am Baum hod a Reachd auf a guads Hoim.“ Ond zom Max hod se gsaid: „Mer hend nemme vill Zeid, bis des Chrischdkendle d’Gschengla brengd, abr des Baimle schmigged mer bsonders schee!“
Als dr Ferdinand des gheard hod, war er gligglich ond edzd widdr schdolz auf seine zwoi Schbidz. Mid aller Mia hod er all sein Safd end Nodla bressed. Hod dann wunderschee aus-gschaugd mid all deane Glas-kugla, de Lichdla dra ond erschd reachd bei dr Bescherung mit deane bunde Päggla vom Chrischdkendle drundr. Au a gloine Eiseba isch rundumadum gfahra. Dr Max war so schdolz aufs Baimle, dean er selbr ausgsuachd hod, er war firs Biable oifach dr schenschde Baum, deans zom Kaufa gea hod.

Dr Ferdinand hod gschdrahled

Ond dia Deg noch em Feschd hod dr Baba da Baum auf da Balkon naus gschdelled, dass er bei deam kalda Weddr mid a bissle Schnea draußa längr frisch bleibd. Sei elegdrische Beleichdung hod, wenn’s dungl wora isch, bis auf d’Schdroß na gleichd, noi, er hod gschdrahled.
Bis weid en da Januar nei hod er kaum Nodla gschmissa ond bis Maria Lichtmess hods Baimle guad ausgschaugd – bessr häd’s dr Ferdinand id dreffa kenna. Er war zwar gwieß id dr schenschde, abr dr gligglichschde Chrischdbaum ibrhaubd.
Stefan Gruber
4
Diesen Autoren gefällt das:
2 Kommentare
8.732
Sebastian Summer aus Aystetten | 24.12.2018 | 10:09  
907
Katharina Wieser aus Augsburg - City | 24.12.2018 | 11:32  
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.