Wortschätzle 138 -Scheanr Windr odr Sauweddr?

(Foto: Sonja Schönthier)
Kaum hab i a Wortschätzle zom Windr gschrieba, hauds au bei ons an Haufa Schnea her - schaugd doch grad echd schee aus, auch wenn's an viele Schdella broblemadisch isch, vorallem auf de Schdrossa.

I kenn's no, als jedr Windr kald war ond mid richdig vill Schnea bei ons.


Wia schee isch so a Schbaziergang en am vrschneida Windrwald, wenn so ganz leichd d’Schneaflogga rariesled, dr Schnea ondr de Fiaß bei jedem Schridd gnarzd. Elles schaugd so frisch ond saubr aus. Wenn d’Sonn zwischa de Baim durchblidza duad ond an dr Fuddrschdell ’s Wild was zom Fressa hold..., wia schee.
Abr was hend mir meischd? A Sauweddr! Mir send weid weg von deam romandischa Weddr alle Joar, wo mer frier zom Schlidda fahra ganga send. Wo noch am Schbaziergang da Schnea vom Gwand weg globfd hosch, d’Hausschua adoa ond dr was Warms zom Drenga gmachd, di auf em Sofa in d’Wolldegg eigigled hoschd ond de Herrgodd an guada Ma hosch sei losch. Aber grad dia Deg deng i mir, es isch wia frier, wo eh faschd elles bessr war.
Ond hod’s bei ons amoal an Schnea, dann hauds an Haufa her, den schiab mer mit de Schneaschaufla zam, ond glei werd’s Weddr widdr warm, dr Schnea nass ond schwer, d’Baim breched vom Gwichd, iberall Madsch, Badschlacha, Baaz ond Dregg. Bisch dann draußa, reagneds meischd, Drobfa bleibed auf de Brillagläsr schdanda, bald sigsch nix mea ond fangsch ’s Buzza an, vrschmiersch mea als dass hilfd. Ond wenn au d’Schua dichd halded, es gnirschd nix, dr Madsch schbridzd, d’Hosafiaß san drnoch hinda rauf dregged ond d’Hos onda rom badschnass. Schaugschd aus wia a Loas. Ond wenn’s dann gfriara duad ...
I mog's richdig kald. Liabr ded i Dag fir Dag Schnea reima ond mei Audo abgradza.
Ond a baar Kilomeddr weidr hend se vill z’vill vom Schnea ond versaufed schier drin. Elles isch so ogreachd vrdoild.
Stefan Gruber
4
Diesen Autoren gefällt das:
4 Kommentare
8.765
Sebastian Summer aus Aystetten | 11.01.2019 | 15:57  
908
Katharina Wieser aus Augsburg - City | 12.01.2019 | 08:15  
8.765
Sebastian Summer aus Aystetten | 12.01.2019 | 11:23  
3.800
Enrico Baumann aus Augsburg - Süd/Ost | 13.01.2019 | 12:19  
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.