Wortschätzle 145 - Ans Radla muass ma sich widdr gweana

(Foto: Symboldbild Natthapon Ngamnithiporn 123rf.com)
Dr schwäbische Hendra isch ned wergle fir an Saddl gmached.

A weng a guads Weddr hammer ja scho ghed, also grad reachd zom Radla. De erschd Fahrradtour em Joar isch ja scho was ganz schbeziells. Erschd muasch gugga, obs Radl ibrhaubd no
duad. Isch a Lufd en de Roifa, san d’Mändl no guad odr hend se Riss? Isch d’Kedde gschmiered odr elles zambicha?
Ja mei, dia Kondrolle
muass sei, soschd schdosch bletzlich em Wald ond dr Drohdesel duad nemme. Also ’s erschde Ziel war a Wiidschafd, ned so ganz weid weg – so a guade Schdund zom Drabba. Abr scho bald isch es a weng, blos a weng, da Berg nauf ganga ond scho hab i’s en de Oberschenkl gmergd, langsam hods
agfangd zom brenna, ond schnaufa hab i au reachd missa, ond dr Wend isch emmr von vorn komma, als ob i en dr Faschdazeid au no Sinda biaßa missd.
Irgedwann war mer do, a Bierle ond a gloine Brodzeid ond bald isch es widdr hoim ganga. Abr scho beim Draufhogga hab i gmergd, de schwäbische Hendra, zumindeschd mei Fidla, isch ned
wergle fir da Saddl gmached.
Endlich drhoim hod es sich agfieled, als ob i an Hendra rod ond gschwolla häb wia a Pavian ond zwischa de Bäggla Sand reibd. Koi scheas Gfiahl, aber no zwei, drei Radtoura, ond ma ischs widdr gwohnd.
Stefan Gruber
3
Diesen Autoren gefällt das:
1 Kommentar
9.405
Sebastian Summer aus Aystetten | 01.04.2019 | 21:47  
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.