Wortschätzle 154 / Bei mir derf faschd elles wagsa

D'Insegda freiad sich ibr d'Sonnabluama en meim Gärdle.
Wasser kommd aus em Schlauch, vom Brunna oder Gumpa.

Also elles loss i ned en meim Gärdle wagsa, aber so manche Sacha ganged von alloi auf, so meine Weddrkerza, drei hab i em Garda, ond grad schee send se. Wenn se em Herbschd drogga send, dann kenned d’Insekda sich drin vrgriacha. Au meine Sonnabluama send vo alloi aufganga, i hab se allwei gossa, ond edzd send se scho bald zwoiahalb Meddr hoch ond geschdern isch de erschde aufganga. Wia groß send denn uire Sonnabluma? D’Hummla hab i heid scho dra gsea. Ond em Herbschd dirfed Vegela Kearala rauspigga. Abr em Friasommr send so manche Pflänzla ganz vo alloi aufgagna, so dr Beinwell, de Insegda gfälld’r, allwei sigd ma se dra rumschwirra. Au Akeleia ond Aschdra kommed allwei widdr, d’Herbschdanemon schdreggd eh scho d’Bliada end Hea, genau so dr Gilbweiderich. Au d’Ringela sigd ma en vrschiedene Farba zwischa meine Tomadaschdauda – elles isch grad reachd bund em Gärdle ond nebahi hogga, oifach gugga ond a bissle ausgruaba duad guad.
Abr a weng a Pfleag muss ma deane scho angedeiha lossa, a bissle Hornschbähn, a Blaukorn, a weng häggla ond allwei a weng giaßa.
Giaßa isch ja scho schea, wenn ma middm Schlauch schbridza ko, aber au med ra Kann ko ma vom Gumpa Wassr holla – abr a Wassrloch hod ja kaum oinr, am beschda Fall aus em Fass, wenn ma drvor am Brunna bumba duad. Edzd fälld mr ei, en de Schdauda gaid’s ja an Weilr der hoißd Gumpenweiler, des hod beschdimmd au mid Wassr zom dua – woiß es wer? Wer’s id woiß, „Gumpaweilr“ isch glei neaba Habertsweilr glega.
3
Diesen Autoren gefällt das:
3 Kommentare
1.163
Katharina Wieser aus Augsburg - City | 01.08.2019 | 19:17  
9.405
Sebastian Summer aus Aystetten | 01.08.2019 | 22:37  
25
Martha Plaseller aus Augsburg - City | 07.08.2019 | 19:48  
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.