Wortschätzle 156 - Schdeggerlfisch ond Brauseschdäbla

Des san de echde Brauseschdäbla vom Plärrer. I hab se zom Fressa gern.

Da ganze Dag da Plärrer vor dr Diar ond gschroiede Mädla. 

Wenn i was Ehrlichs ibr da Plärrer schreiba sodd, dann eigedlich, dass i deswega jeda Dag kaum an Parkbladz midm Audo griag, wenn i end StadtZeitung ens Büro fahr. Ond wenn i dann weared dr Plärrerzeid, so wia oimoal dia Woch, an Schrofzeddl hendrm Scheibawischr fend, dann schdingds mr. 25 Euro, weil i ned gsea hab, dass i scho dr zwoide Dag falsch pargd hab, es isch hald a Bereich wo bloß Anwohner ihr Kärrele abschdella dirfed. Also morga fahr i mid dr Funkaschäß ond schlarpf de ledschde Meddr z’Fuaß ens Büro. Nachdeam i heid ab Middag em Büro da Gruch vom Schdeggerlfisch onds Gschroi von de junge Mädla hab genießa dirfa, hab i mr aufm Plärrer aufm Weag zom Audo no Brauseschdäbla koffd – obwohl’s mr ned guad duad, do ka i mi echd ned zrigghalda. Mei Kollegin hod erzähled, dass se von deane saure Dingr Pickel griagd, mr bassiered da nix! Brande Mandla ond Zuggerwadde send mr ned so wichdig, abr Brauseschdäbla . . . ond wenn dann glei zwoi odr drei end Gosch neischiabsch . . . Ja, de oine hend da Schbaß beim Bier ond de Fahrgschäfd ond i mid de Brauseschdäbla. Aber dr Plärrer isch ja bloß zwoimoal em Joar ond des isch guad so. I kauf mr ganz gwieß widdr Brauseschdäbla!
2
Diesen Autoren gefällt das:
1 Kommentar
9.405
Sebastian Summer aus Aystetten | 29.08.2019 | 12:36  
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.