Wortschätzle 164 - Dr Advend kennd so endschbannd sei

Eine Gans gibt es in vielen Familien zu Weihnachten. (Foto: Heinz Leitner 123rf.com)
Ohne Hegdig wär Weihnachda bloß halb so schea.

Ibrall gibd’s Lebkuacha, Weihnachdsmärgd mid Gliahwein ond Chrischdbaim. Isch scho klar, was es an de Feierdeg zom Essa gaid? Send Gschengla scho verpaggd? Ja, au am 24. Dezembr weared no Gschengla koffd, i woiß.

Viele hend da Baum ja scho aufem Balkon odr em Keller schdanda, do wo’s hald kiahl isch. Abr hend ihr au ’s Moos firs Gribble scho em Wald ghold? Hend ihr gugged, ob des ganze Weihnachdszuig zom Dekoriera ond zom Baum schmigga beianand isch? Ob elle Kugla glänzed ond boliered send, ob elle Lämpla an dr Lichdrkedde brenned, odr ob widdr ois ned duad? Dann muass ma kondrolliera obs Lamedda ned gripplig sondrn schea biegled isch. Ond wo isch dr Schbidz fir da Baum? Edzd wär au no Zeid, nuie Schderala aus Stroh odr Babier zom baschdla, Ahängerla aus Salz- odr Loibladoig zom bagga ond schee bund zom verziera. Ma kennd au no so Aufhängerla fird Kugla bsorga, weil von deane duan allweil welche fehla ond dann ischs Gschroi groß.

Isch des elles hergrichd, dann isch de ledschde Frog: Wo isch der vermaledeide Chrischdbaumschdändr bloß hikomma? Na en dr Keller, na do isch er ned, nauf en da Schbeichr ond da gsuached ... do isch er au ned. Ond leschdendlich isch er, wia all de vorige Joar au, en dr großa Kischd ganz unda drin, ondr de ganze Schachdla mid de Chrischd-baumkugla aus Glas ond de gschnidz- de Gribbafigura. „Alle Jahre wieder ...“ der Satz bassd ned bloß aufs Chrischd-kendle, sondrn gild au fir elles drum rum.

Also: Duad no reachdzeidig uir Zuig kondrolliera, ned dass no ebbr am 24. nachmiddags Kuglaufhängr koffa muass. Es roichd, wenn ma oi goddsigs Gschengle vergessa hod ond ma nomml los muass.

Hend ihr da Broda, d’Gans, da Karbfa, d’Wirschdla scho? Wenn ned, weard’s abr schleinigschd Zeid. Ond i sig’s scho, wia en manche Familien ’s Fondue-Bschdegg gsuachd weard: „I hab d’Gabla ledschdsmoal en dia Schublad nei doa, ganz gwieß!“ I winsch Eich no an endschbannda Endspurd bis zom Feschd!
(Stefan Gruber)
2
Diesen Autoren gefällt das:
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.