Wortschätzle 158 - Dr Schwob, der hod a Schnäpple gmachd

A gscheida Handwerkszeig brauchd ma zom Kocha. Ond wann ma's ginschdig griagd,grfeids da Schwob. En andre Pfanna ka ma gwieß au guad broda - ned bloß en meiner.

Also es isch ja bekannd, dass i gern guad essa dua ond au gern koch. Drzua gherd abr au a passable Ausschdaddung en dr Kuche.

Als i mir a Induktionsfeld koffd hab, hab i a baar Depf ond Pfanna wegdua missa. Ond edzd send meine zwoi beschichdede Pfanna so schleachd beianand, dass i mer ibrlegd hab, nuie zom Kaufa. Also war i em Schdädtle, hab mi moal schlau gmachd, was es so geid. Tolle Dingr, mid ond ohne Designpreis, leichd ond au bsondrs schwer, rond ond eggig. Mid ond ohne Antihaft-Beschichdung - abr grad dia hab i so gfressa, dass i koi Pfann mehr haba will, mit so ra Auflag. Liabr nemm i a baar Drobfa Öl mehr.

Ond dann hab i se gsea, a tolle Edelstahlpfann, inna mid am ganz bsondra Muschdr, en kloine Mulda isch se dann abr doch beschichded, abr so, dass ma des Madrial ned aufscherra ka. Ja ma sodd id dren rumgradza! Ja, au i woiß, ma soll bloß mid Blaschdig- odr Holzschbachdl en d'Pfann nei geha, 's Fleisch omdreha ... abr wer duad's au emmer?

Gnua gschwädzd, i hab mi en dia Pfann verguggd. Dann hab i aufs Breisschildle gschaugd ond do hods mi ja faschd auf da Hendra na-gsedzd: 129 Euro! Ond des fir a Pfann dia dr Beipackzeddl lobd ibr da Schell-Obr, oms Fleisch hoiß azbroda. Ond en de Läda en dr Schdadt isch es ja ned so wia auf dr Duld, wo ma deane Verkeifr zuaschaua ka, wia se koched, wia se 's Zuig absichdlich neibrenna lossed, om zom Zeuga, was dia Pfanna kenned.

Also dia Pfann war mer zduir. Vorbei war's mid dr Liab. I be hoim ganga. A baar Deg schbädr hab i mi am Computer em Internet aufd Suach gmachd noch Pfanna, auch noch gebrauchde Pfanna. Ond dia oine isch mer ned aus em Hira ganga, ond was soll i saga, i be findig wora: De gleich Pfann wia i fir 129 Euro en dr Schdadt gseha hab, dia hod oinr a baar Kilomeddr weg von mir verkaufd fir 20 Euro. Also be i nausgfahra ond hab se ghold. Fir des Geld isch ned vill hi, wenn se Mischd isch. Verkaufd hod er se, weil eam elles neibrenna duad. I glaub der hod ned kocha kenna - deam brennd 's Wassr au no nei. I koch edzd mit ra duira Pfann dia i billig griag hab, ond 's machd mir a mords Freid. Erschdens isch es schee zom Broda en dr Pfann ond i hab a richdigs Schnäpple gmachd, so wia's an eachda Schwob gfreid - schbara, schbara ... Edzd ka se zoiga, ob se ihr Geld wert isch. Ond de alde Pfanna hau i naus. (Stefan Gruber)
1
Einem Autor gefällt das:
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.