Wortschätzle 163 - A bissle umasoschd fahra: A reachdr Boggmischd isch's

Weid ka ma en Augschburg ned umasoschd fahra. (Foto: Stadtwerke Augsburg)

Dr Schwob gfreid sich: Endlich gaids was umasoschd: Ab 1. Januar derfsch a Schdiggle Schdrossaba en dr Augschburger Innaschdadt umasoschd fahra!

Dass des a Augawischerei isch, mergd er vor laudr Freid eh erschd schbädr - ond dann isch's widdr amoal zschbäd. Drodzdeam, mir schwädzed zwar Schwäbisch, send abr ned bled ond au ned auf dr Brennsubb drher gschwomma. D'Idee war ja guad, isch abr moal widdr vorem Loch verregd. De Schdadtobere ond de Schdadtwerke koschds ned so vill, ond ma schdod guad da, ma hod ebbes gmachd.

Da kommsch von dussa rei ond moinsch, da kosch edzd umasoschd en Augschburg mid dr Funkaschees fahra, dann bisch echd enddeischd. Wo sollsch denn dei Audo abschdella? Auf em Plärrer? Dann muasch fir zwoi Haldeschdella Schdrossaba zahla, bis em Umasoschdbereich drin bisch ond zrigg zom Audo mid de Eikeif widdr.

Wenn von dussa end Schdadt nei fahrsch, bringd's dr eh nix. Guad, d'Kurzschdregg isch a weng längr wora. Da reded sich welche doch des nuie Nahverkehrskonzebt schee, odr brauched se des fir de nägschde Wahla om besser dazschdanda? Abr bragdisch isches scho, wenn mid de schwere Eikaufsdascha ondrweags bisch, da sprengsch schnell auf ond au glei mea ra. Aufbassa muasch abr, dass allwei reachdzeidig raus kommsch, soschd bisch a Schwarzfahrer. Also elles en ellem isch des a reachdr Schmarra mid deam Umasoschdbereich. Dr Schwob gfreid sich erschdmoal, weil er nix zahla muass, bis er drauf kommd, wo's glemma duad. Denn wer duad scho bloß en deam enga Bereich fahra? Ond fir de andre gaids so nah am Umasoschdbereich koine Parkplädz ned, dia ma nudza ka ohne ned widdr blecha zom missa.

Mid deam nuia Nahverkehrskonzebd soll sich dr gniggrig Schwob bauchpinsled fiala, abr eigedlich ischs a reachdr Mischd - elles bloß fir da kommede Augschburger Wahlkambf. D'Augschburger Schdadtregierung klemmed mea ond will id wergle inveschdiera in a audofreie Innaschdadt, abr nach außa wolled se mid dr Umasoschd-Strossaba guad ausschaua, des duan se ja, aber merged dia da oba eigedlich ned, dass mir ons drmid verscheißred fialad? A reachdr Boggmischd isch's - gniggrigs Lumbapagg, elles bloß a polidischs Gschäfdle ond Geschachr.

(Stefan Gruber)
0
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.