Wortschätzle 143 - An Heringsgrabfa biddschee!

Dr Bismarck-Grabfa mit Schnaps - is er bald in aller Augschburger Munde?
Kulinarisch duad sich bei de Schwoba grad a neie Weld auf.

Also wo i gherd hab, dass edzd aufm Schdadmargd en Augschburg Grabfa mid Lebrkäs drin ond siaßem Sembf drauf gibd, hab i ja bloß da Kobf gschiddled – weam’s schmeggd. Abr eigedlich isch des gar id so verkehrd, i hädd do au no a baar Idea, wia d’Bäggr ond Konditora neie Kundschafd griaga kennd. Grad em Fasching, wo ma en dr Fria no zom Kadrfriaschdigg god, da send Hering ond Weißwirschd ja ganz gfrogd. Also nei drmid end Grabfa!
Heringsgrabfa mid Zwiebl ond Girgla drauf, a Brodhering-, Rollmops- odr au Bismarck-Grabfa, isch ja eh scho bissle siaßsauer, do bassd dann d’Marme em mid Pudrzuggr gschdaubda Grabfa au guad drzua. Fir dia, dia de Fisch id megad, kennd ma an roda odr weißa Bressack nei doa mid Zwiebl ond an scharfa Sembf. Abr a Schnabs zom Fisch ond Bressagg muass drzua sei, soschd griagsch es ned na. Wer’s a weng exglusivr mog, der duad an guada beizda Lachs nei, a Seesle vom frisch griebna Meerreddich ond a Leffele Breislbeermarme drzua, dr Grabfadeggl drauf ond a Gläsle Cham-pagner drzua. Des kennd dr Luxuslada am Margd au abieda fir seine illuschdre Gäschd dia do allwei em Schaufenschdr hogged ond gsea weara wolled. D’Boira kenned ja d’Weißwirschd ens Schmalzbaggne neidrugga mid Sembf ond a Woiza drzua, Debreziner ond Wiener Wirschdla
duans au.
Dr guade alde Grabfa hod abr sicher id ausdiend, mid Marmelad, rod odr gelb, mit Vanillpudding oder Schokosahne gfilled, mit diverse Verzierunga drauf – do bassd dann nadierlich nochmiddags a Hafa Kaffe odr Tee drzua.
Also wer außer deam Leberkäsgrabfa zukinfdig oin vo deane oba gnannde Grabfavarianda abieda odr macha will em Original oder en ra Abwandlung, dia habe i erfunda! Mergd es eich, der muass erschd mi froga, ond zahla, dass er meine Grabfaversiona macha derf. I be a Schwob ond will Geld seha. I hab’s Reachd dra, odr muass i do edzd egschdrig all dia Nema schidza lossa ond a Badend amelda fir da Bismarck-Grabfa & Co, ond dann au no fir d’abgwandlede Kiachla, de belegde Auszogne?
Fir da Schwob embfehl i eh no an ganz andra Grabfa: an Schwäbischa-Wurschdsalad-Grabfa mid Schwarzwuuschd ond Käs drenna mid am Glas Moschd odr Bier drzua – ond mid schee vill Zwiebl. An Obazda mit schee Romadur dren kennd i mer au guad vor-schdella ... da Obazda-Grabfa, odr au mid Bluad- ond Leberwuuschd mit Sauergraud ... An Guada!
1
6 2
5
Diesen Autoren gefällt das:
Lesen Sie auch die Bildkommentare zum Beitrag
4 Kommentare
723
Silvia Bomhardt aus Neusäß | 24.02.2019 | 19:35  
8.925
Sebastian Summer aus Aystetten | 25.02.2019 | 15:12  
Stefan Gruber aus Augsburg - City | 25.02.2019 | 15:16  
8.925
Sebastian Summer aus Aystetten | 02.03.2019 | 16:58  
Schon dabei? Hier anmelden!
Schreiben Sie einen Kommentar zum Beitrag:
Spam und Eigenwerbung sind nicht gestattet.
Mehr dazu in unserem Verhaltenskodex.