Wortschätzle 109 - Es bridzled – mid ond ohne Schbugge

De ald Goggelesbrigg stod etz do em Zoo rum bei de Robba - a neie hammr allweil no ned.

Laudr Luggabeidl: A neie Goggelesbrigg war vrschbrocha. Anscheinend wars bei manche dr Bäradregg, der se an frier erinnred hod. Obr guad gschmegged hod, isch ja egal, ’s isch dr Gschmagg, dr Gruch, der so im hendra Hira, en de hendre Hirnwindunga abgschbeichred isch ond dann ganz bledzlich wiedr vorkommd, ond so a Gfial auslesd – hoffendlich bei de meischde a guads Gfial. Mir gods au so, wenn i an Brause denk.
An dr Werdach bin i in Pfersee aufgwagsa, hab, wenn’s ganga isch, en dr Werdach gsandled ond gschbieled. Ond im Sommer so vor gnabb 50 Joar bin i manchmoal zur Goggelesbrigg zu dem Kiosk under de Drauerweida naglaufa, do wo se dean Schbidz ghabd ham – dem Hund hab i nia draud. I glaub der war a weng hendrfodzig.
Ibr dia allwei no felede Goggelesbrigg kenndad mr ja ewig lamendiera ond ibr die Schdadregierung, dia se ons nochm Abriss verschbrocha hod wiedr aufzbaua – ’s war elles gloga, hald bloß Gschwädz! A aldr Pferseer vrgissd eich des nia!
Zrigg zur Brause: An gloina Tongruag mid Hengl hab i en de Hend ghed ond bin zum Kiosk grennd. Fr a Fuchzgerle odr a Mark hab i mir Brause kaufa dirfa. Des warn domoals die blasbunde, siaße Brausedabledda, i glaub oine hod zwoi Pfennig koschd, abr sichr bin i mir nemme – ond wia i mi kenn, hab i ned elle mit hoim brochd – i hab scho welche aufm Weag gessa. En dr Erinnerung waren’s hald so guad.
Ond domoals gabs au scho dia Didla mit dr Brause drin mid deam blaua Madrosa drauf ond von dr gleicha Firma dia Gledzla mit Brause. Es war oifach so guad, hod so bridzled em Mund.
A baar Joar schbädr isch oim ja vrganga, als ma em Film von dr „Blechtrommel“ gsea hod, wia ma d’ Brause in da Bauchnabl von de Mädla neischüdd, draufschbuggd ond ward bis schaumig wird ond dann aufschlozza duad. Nomml a baar Joar schbädr send dia Brausedidla mit dem blaua Kopf nomml begehrt wora, abr desmoal mid Schnabbs, da hod ma se mit Wodka gschlugged – war au ned schlechd – ond hod so drumslig, so bsoffa gmachd – ahoj!

Kommentare

Anmelden um Kommentare zu schreiben

Neueste Kommentare

Herausgelockte Frühlingsboten ......
16 Stunden 15 Minuten
Herausgelockte Frühlingsboten ......
1 Tag 6 Stunden
Krokusse mit Besuch
1 Tag 10 Stunden
Eichkatzl
1 Tag 10 Stunden
Eichkatzl
1 Tag 10 Stunden


X