Wortschätzle 113 - Gschabde, Ghobelde odr Durchdruggde

Lang ond dinn kommed dia durchdruggde Schbätzla aus meim neia Schbätzlaschwob raus.

D’Form der schwäbischen Leibschbeis kann variiera: lang odr eher rund.

Stefan Gruber

Dr Schwob definiert sich ja undr anderm durchs Essa ond ned bloß ibr d’Kehrwoch ond da Bauschbarverdrag. Kehrwoch muass i ned macha ond Bauschbarverdrag han i koin – bin i jedzd a richdigr Schwob? I glaub scho.
Vor 34 Joar han i zom erschda Moal die andere Schbätzla kenna glernd, die dünne lange ausm Schbätzlaschwob. Des isch dia Bresse mid de runde Lechr am Boda, dia ma au nemma ko, om Kardoffl fr da Kardoffl-brei zom durchdrugga. Da Doig duad ma oba nei ond dann drugged man ens kochede, gsalzne Wassr nei. Ausschaua duan se dann wia a weng ufermige Nudla – bei der Bemerkung wern d’Wirdaberger ja faschd fuxig. Abr dia hend ja no dia Meglichkeid, d’Schbätzla mid’m Messr vom Bredd zom Schaba. I gebs zua: Des ko i ned guad, do breichd i mehr Ibung, des loss i sei.
I bleib ja bei meine Knebfla, des san dia Schbatza, dia ma durch de Hobl griagd, neimodisch gibd’s ja au no des Lochblech wo ma da Doig drauf duad ond dann mid am Schabr durch- schdreichd. Welche san jedzd dia richdige Schbatza? Weil mir Schwoba disgudiered dann ja au ernschdhafd, welche d’Soß besser aufnemmed ond welche end Kässchbadza besser nei bassed. De richdige Schbätzla san oifach dia, dia ons grad am beschda schmegged.
Noch 34 Joar han i mr dia Woch en Ulm an Schbätzlaschwob koffd ond widdr drhoim han i nadierlich glei Schbätzla gmached. Hab se kald wera lossa ond dann mit Essig ond Eel zom Salad agmachd, kräfdig ausem Garda Schnittlauch dribr gschdreid ond im Kialschrank durchzia lossa.
Bei dem scheena Weddr war des so guad, dass i ibrleg, meine „Saure Nudla“ zukinfdig bloß no mit de druchdruggde Schbätzla z’macha, ond mr dia Arbed mit de selbrgmachde gschniddne Nudla fr da Salad schbar.
Ond wenn ma do no a Wuschd, Zwiebla, Essiggurga, an gscheida Schdingrkäs neischneid, a guads Seeßle drzua machd, dann hod ma an richdig guada Nudlsalad – der am Schwob wirglich guad z’Gsichd schdohd.

Kommentare

Anmelden um Kommentare zu schreiben

Neueste Kommentare

Im MUGS kann man in Kunst spazieren
1 Tag 6 Stunden
Sonnenuntergang
2 Tage 17 Stunden
Heute morgen : sonnig, windstill, kalt
2 Tage 17 Stunden
Die ersten Stare sind schon da ...
2 Tage 17 Stunden
Die ersten Stare sind schon da ...
3 Tage 35 Minuten


X