Wortschätzle 144 - Faschdazeid war bledzlich do

Wenn vom Essa was ibrig bleibd, dann ka ma's en Blaschdigschachdla guad no zwoi Deg aufheba.

Dr Kialschrank war no voll ond Essa schmeißd ma id weg.

Oinahalb Wocha isch d’Faschdazeid scho ald, mergd’s Ihr scho was? Druggd bei eich Mannsbildr d’Girdlschnall wenigr ondrm Ranza odr schbannd Blus bei de Mädla wenigr om da Busa rom?
Also i hen da Afang von dr Faschdazeid vrbassd. Mei Kialschrank war so voll, i konnd id afanga, i häd ja Zuig wegschmeissa missa, de ei-gschwoißde Mauldäschla mid am Haldbarkeidsdadum, des ned hendr Oschdra isch. Odr häd i d’
Wuuschd, dia au no guad war, weg doa solla? Gwieß ned, mr Schwoba lossed nix vrkomma. Des wär ja wia en dr Wiidschafd, wenn da Dellr ned leer fuadreschd. Ma hed da Reschd eipagga lossa kenna – fir da Hond drhoim. Ja, ja, wer’s glaub, fir da Hond... Es isch beim Schwob fir da negschde Dag. Des erinnred mi an a alde Dand selig, dia, als se scho guad ibr Achzg war, emmr a Blaschdigbix en dr Wiidschafd drbei ghed hod. Am End vom Esse hod se aus dr Handdesch raus zoga ond hod da Reschd allwei einpaggd – des werd zahld, des loss mer ned vrkomma.
Des Joar isch d’Faschdazeid so bledzlich komma ond mei Kialschrang war voll, eigedlich wia jeds Joar ond edzd rendierd sich’s au nemme z’Afanga bis Oschdra. Also negschds Joar widdr, heir hab i widdr moal ned Obachd geba.
I kennd au aufs Fernseh gugga verzichda, abr des ibrleg i mir no ganz genau.

Kommentare

Anmelden um Kommentare zu schreiben

Neueste Kommentare

Ein echter STAR
2 Tage 16 Stunden
Schöne Gärten in Haunstetten ....
2 Tage 17 Stunden
Schöne Gartenzäune .... ein Streifzug ...
2 Tage 17 Stunden
Schöne Gärten in Haunstetten ....
2 Tage 22 Stunden
Mit offenen Augen durch die Natur gehen!
2 Tage 22 Stunden


X