Wortschätzle 151 / Koine Mauldäschla en Holland

"Nieuwe Haring" in Holland mid Girgla, Zwiebl ond am Bier, des machd mi zfrieda.

Wenn em Schwob sei oigens Essa em Urlaub fehla duad.

Wer en da Urlaub fahraduad, der ko hendrher au was vrzähla. Ond wia des schdimmd. Also i war gwieß ned auf dr Fluchd vor de Schwoba ond ben nach Holland gfahra. Do isch es aber schwäbischer wora, als i häd mer’s vorschdella kenna.

I ben an so am Schdrossaschdand en Amschdr- damm agschdanda, om an Nieuwe Haring zom kaufa, so an frischa Hering mid saure Girgla ond Zwiebel, so ganz zard, dass d’n mid dr Zung en dr Gosch zerdrugga kosch – auf elle Fäll was ganz was guads. Do war dann hendr mir en dr Schlang noch a Pärla agschdanda, boide so kurz vor em Rendaaldr. Do sagd doch der Ma zu seiner Frau: „Du, Herda, i glaub i hädd edzd doch
liabr agschmelzde Maul-
däschla.
Deam sei Frau hädded ir erleba missa, hod dia gosched, hod eam an kulinarischa Ignorand ghoißa, der ned ibr sein oigena Dellerrand gugga ko. „Waldr, Du isch edzd was i dr kauf, ob’s dr schmegga duad odr au id. Ond deine Mauldäschla kosch ibrmorga essa, wenn mer widdr drhoim send. Ond edzd isch a Ruah, brauchsch nemme lamendiera – mer send no em Urlaub.“ I hab se dann gfroged, aus Geislingen wared se ond sen fir a Woch en Holland. Sie mog dr Fisch, er id, sie mog de holländische Poffertjes, so a Ard winzig kloine abr digge Pfannkiachla mit Buchweizamehl em Doig dren, mid vill Buddr drauf ond Pudrzuggr driberd. Er hod dann glei gsagd, Herda, wenn mer drhoim send machsch au widdr gscheide Pfannkuacha mid Breschdlingsgsälz (Erdbeermarme).
Dr arme Waldr, da ganze Urlaub griagd er koine Maulschdäschla ned. Aber er duad mir ned wergle leid, i hald’s au vier Wocha ohne Kässchbätzla aus – wenn’s sonschd was Gscheids zom Essa gaid.

Kommentare

Anmelden um Kommentare zu schreiben

Neueste Kommentare

Kirschbaumblüte
18 Stunden 25 Minuten
Blacky
3 Tage 6 Stunden
Lerne von der Geschwindigkeit der Natur: ihr …
3 Tage 13 Stunden
"Wir halten für euch die Stellung": …
3 Tage 13 Stunden
Magnolienblüte nach Kälteeinbruch
4 Tage 23 Stunden


X