Wortschätzle 172 - Was mach i edzd blos mid dera viela Zeid?

I hab doch no a Päggle von dera alda, abglaufna Droggaheff ausbrobierd, und was soll i saga? Sie isch aufganga, also hab i glei no Abflnudla gmachd. Hab se schee auf Buddr ond Zuggr gsedzd ond en meim gusseiserna Dobf ens Rohr nei gschoba, noch 40 Minudda bei 180 Grad wared se ferdig, mid a bissle Karamell dra auf dr Undrseid. Fir a alde Heff schaued se doch guad aus, odr? I ka Eich bloß 's Maul wässrig macha: Wenn ihr edzd riacha kennded, wia guad des grocha hod ... I sags Eich, mei selig Groaßmuadr, d'Gruber-Oma, wär schdolz auf mi, ond dia hod allwei echd guade Abflnudla gmachd. Duads Eich no a bissle gedulda, dann kenned ihr au widdr selbr bagga.

I hab so viele Sacha zom Doa, dass i garned woiß, wo i anfanga sodd.

Dambfnudla macha kosch grad vergessa, weils koi Heff mehr gaid, frische hab i ewig koine mea gseha ond Droggaheff au ned. Meine achd Päggla em Vorrad san em Oktobr 2018 abglaufa - dia Heff em erschde Päggle isch ned aufganga, da Reschd schmeiß i wohl naus.

Dass koi Klobabier nemme gaid, isch scho seldsam – wenn abr an dr Kass em Subbrmargd bisch ond da Kassier freindlich drnoch froga duasch, dann schdod er vielleichd auf, said „Moment“ ond hold oins aus em Kämmerle – wergle, i be an dr Kass drhendr gschdanda ond habs mid oigene Auga ond Ohra gseha ond gheard, wia des diregd vor mir bassierd isch – dia Leid wared froh. Abr schlimm isch, dass teilweis d’Abwasserrohr Brobleme griaged, weil d’Leid d’Kucherolla firs Fidla nemmed od des Babier sich ned so auflesa duad wia Klobabier. Da verschdobfed dann elle Rohr – i mog mir des garned vorschdella, wann nix mea god. Also Leid, bidde duads des digge Babier en dr Kuche lossa. Ihr missed eich glei en dr Fria aschdella, da send Regal aufgfilld ond dann duads brav oi Packong kaufa ond wenn dia ausgod, kaufed ihr de negschde – egal ob oi-, zwoi- odr gar dreilagig.

Abr a Heff han i au en dr Fria ned griagd. I glaub, i ibrleb dia Krise au ohne Dampfnudla, mach i hald Schbädzla, da drmid hod ma mi groß griagd ond des daugd mr heidzdag au no.

Viele Leid hend Kendr zom hiada, abr de andere, losds eich was eifalla, duads dia Zeid drhoim nudza ond duads all des Zuig, zu deam ihr soschd ned komma duads, weil ihr widdr irged a Ausred gfunda hend. Zom Zeid dod schlaga driffd mi heir wohl dr Friahjoarsbudz. Odr griag i no reachdzeidig a hefdige Wasserallergie? Sodd i aus laudr Langeweil erschd Fenschdr budza?

Abr na ned hudla, z’erschd mach i no mei Gärdle bereid fir meine Tomada. Alloi derf i des ja no doa ond des isch wichdig, drnoch ka i allwei no budza.

Ui elles Guade!

Weitere Bilder

Kommentare

Anmelden um Kommentare zu schreiben

 

Neueste Kommentare

Ein Platz, um die Seele baumeln zu lassen
9 Stunden 11 Minuten
Ein Bläuling, aber welcher?
2 Tage 21 Stunden
Ein Bläuling, aber welcher?
3 Tage 6 Stunden
Ein Bläuling, aber welcher?
4 Tage 10 Stunden
Augsburger Stadtsommer
5 Tage 14 Stunden


X