Wortschätzle 168 - Edzd missed bald Tomada zoga weara

Bald schdanded ibrall auf de Fenschdrsimsa Däbfla rom.

So gugged guade Tomadabflänzla aus.

Hend’r eire Däbfla scho sordiered, dia ir zom asäa vo de nägschde Bflänzla fir da Garda brauched? Es weard fei Zeid. So en drei Wocha kend ma scho mid de Tomada afanga, se keima lossa ond dann, wenn se’s zwoide Bladdpärle hend, aussordiera ond zu zwoid odr dridd en a Däbfle pflanza. Abr ned z’warm schdella, soschd schiaßed se en d’He, weared zwar lang aber ned kräfdig.

Ir kennd edzd aber au scho ’s Wergzeig kondrolliera, send Schdiel no guad? Send Häggala odr Messr verroschd? Brauched’s neie Däbfla zom Beschrifda vo de Bflänzla, ihr kenndad Dünger scho eikaufa, Schneggakorn, Blaukorn au ond Hornspähn. Hend ui a Friabeed, dann missed’r gugga, ob elle Seida no guad send, ob was zerbrocha isch odr d’Blaschdigplana verrissa send.

I hab edzd Sama von glaub 40 verschiedene Tomadaarda drhoim, „Andenhörnchen“, „Johannisbeertomaten“, russische Tomadasorda, welche dia schwaaze, greane, rode, gelbe ond rosane Frichd griaged, große ond gloine. 

I frei mi edzd scho, wenn i em Sommer ernda derf. Abr drvor muass ma se aussäa, muass dia Bflänzla behudsam bflega ond aufm Fenschdrsims groß ziaga. Mached ui ferdig, dr Mai ond de Eisheilige send schneller do, als ma denga duad.

Ja dr Schwob widdr ond sei Gärdle, abr warded ab, i glaub, heir miss mer nemme d’Eisheilige abwarda mid em Nausbflanza, i mechds heir frier brobiera. Ja, i dua desmoal Folie driberd, zur Vorsichd. Also duads scho moal da Schbada ond Recha herrichda, zom Beed vorbereida, au wenn erschd da Februar afangd. 

 

Kommentare

Anmelden um Kommentare zu schreiben
Beitrag von LeserReporter: Martha Plaseller
26. Februar 2020 - 16:42

geschtern hab i mei Fribeet grichtet und die erschte Planza gsetzt, Salat und Kohlrabi, es hat sei missa! Dr Frihling kommt,,,,

Beitrag von LeserReporter: Irene Henkel
06. Februar 2020 - 19:25

Dees isch subrr!

 

Neueste Kommentare

Mondaufgang
4 Tage 22 Stunden
Europas Zukunft gestalten – besser zusammen! …
1 Woche 1 Tag
Tödlicher Unfall auf der A8 bei Adelsried
1 Woche 3 Tage
Versteck beim Gewitter!
1 Woche 4 Tage
Auf einem Bein
1 Woche 4 Tage


X