Wortschätzle 170 / En Augschburg missded Kebf rolla

Die ledschd Vorschdellong am Theadr Augschburg vor dr Sanierong war am 19. Juni 2016 - schea war's ond 's Haus isch voll gwea.

Theadr-Planonga ond d’Gschichd vom billiga Schauschbielhaus.

Allwei des Gezerfe om d’Sanierung vom Theadr god mer echd auf da Senkl, na, mir gods jessesmäßig auf da Sagg. Erschd bis s'es gschlossa hend, dann tolle Plän von am neia Theadrzendrum rond oms alde Theadr fir a Heidageld, faschd 300 Milliona Eiro. Warum so deir? Weil se an ganz an renommierda Archidegd ham haba wolla, der sich seine Milliona scho mid andre Theadrsanieronga abghold hod ond weil d’Theadrleidung gmoind hod, ma ko ja edzd brobiera, des Beschde zom Kriaga. Elles ondr oim Dach, a zwoids klois Theadr no drzua, alle Wergschdädda beianand, des wars Ziel.

Vier Schdoggwerg diaf en dr Keller häds na ganga solla – diregd neba dr Kloschdrmauer vo de Dominikaner. Alloi s’Abfanga vo dr Kloschdrwand bei dera Baugruab drneba, ma derf garned dradenga. Dann hod ma gschria, dass es zduir weard – na des war ja koi Ibrraschong ned. Großschburige Planerei ond ibr goldne Wasserhähn hend Augschburger schbegulierd. Ond de Wichdige vo dr Schdad hend wohl ned genau kondrolliered, ob der Blan so reachd isch. Dann ischs ganz schnell om faschd 100 Milliona Eiro billigr wora – edzd solls bloß no om de 180 Milliona Eiro koschda – a abgschbeggde Version. Edzd kommd a Schdadrad drauf, ma kennd widdr was billigr macha, ibr so manche Sacha nomml nochdenga, Wergschdädda auslagra, vielleichd a wenigr bequeme Lesong firs Theadr fenda – da ganze Endwurf nomml ibrarbada odr gar nei macha – no wär Zeid. On em Gaswerg däded se mid dr zwoida Schbielschdädd bleiba. Wer da elles was vr-boggd hod, der sodd zur Verandwordung zoga weara.

Drzua gherd eigedlich au, dass kurz nach 2000 dr damalig Intendand Ulrich Peters dia Idee vo ra zwoida Schbielschdädd scho faschd in droggne Diachr ghabd hod. An duira Archidegdawettbewerb hod ma zahld ond dia Plän hend de Verandwordliche vo dr Schdad en da Babierkorb gschmissa – es wared doch eh bloß bolidische Endscheidonga.

Dia Verandwordliche gheared au heid no gschlaga – domoals hädd des zwoide Schauschbieltheadr als Ersadz fir dia marode Kommedie bloß 10 Milliona Eiro koschd – abr mr hädded edzd ois. Kebf missded en Augschburg rolla – abr dia Erzlumba vo frier kommed eh widdr ugschora drvo – leidr.

Weitere Bilder

Kommentare

Anmelden um Kommentare zu schreiben
Beitrag von LeserReporter: Martha Plaseller
03. März 2020 - 18:33

und zu der letztscha Vorstellung hab i mei schwarz Häs azoga , es war scha traurig! Ob mir des no erleba, dass mer wieder im große "Haus" Vorstellung seha wera?

 

Neueste Kommentare

Ein Platz, um die Seele baumeln zu lassen
6 Stunden 59 Minuten
Ein Bläuling, aber welcher?
2 Tage 19 Stunden
Ein Bläuling, aber welcher?
3 Tage 4 Stunden
Ein Bläuling, aber welcher?
4 Tage 8 Stunden
Augsburger Stadtsommer
5 Tage 12 Stunden


X