Wortschätzle 172 - Iberall schwädzd ma anderschd schwäbisch

Abr ois dirfd doch elle Schwoba gemein sei: D‘Liab zu de Schbädzla, egal en welchr Form, ob Knäbfla odr Lange, mid Käs, abbreinde Zwiebl, Wirschdla, Linsa, Saurgraud odr zom Fleisch drzua.

Elle send mer echde Schwoba – egal ob vom Lech, vom Schwäbischa Meer, vo dr Alb ra odr ausem Allgei.

Schwäbisch isch ja a Weldsproch, ibrall aufem Blaneda hods d’Schwoba hivrschlaga ond faschd ibrall weard’s gschbrocha. Frier scho send se ausgwandred ond hend sich bessre Lebensomschdänd erhoffed. Ond dia ausgwandrede Schwoba hend nadierlich ihr domoligs Schwäbisch midgnomma ond send drbei blieba. Wer vo deane Nochkomma no Schwäbisch schwädza duad, vo deane ka ma no vill alde Ausdrigg erfahra.

Abr au heidzdag im Schwäbischa zwischba Lech ond Bodasee, nei ens Allgei ond ibrd Schwäbisch Alb nauf schwädzd ma ja en jedem Dal, en jedem Dorf ond hendr jedem Huggl a weng anderschd, d’Wördr weared bissle undrschiedlich bedond. Manchmoal nudzed se au andre Begriffe, em negschda Weilr hod drfir a ganz alds Word ghalda ond au moderne Wördr hend Eizug ghalda. Da saged de oine no Gsälz ond bei andre isch es scho a Marmelad, da weard dr Noschdr zom Rosagranz. Au viele Begriffe send als Lehnwördr aus em Französischa ens Schwäbische aufgnomma ond umgformd wora, so Chaise en Fungachaise (Schdrossaba) ond Chaiselongue, dr Parablui ond Droddwar. Schwäbisch isch id iberall dubfagleich.

Ibr de verschiedene Schwoba kennd ma en dr Gschichd vo de Sieba Schwoba nochlesa, dia elle aus ra andra schwäbischa Gegad komma send ond eigedlich elle als reachde Droddl dargschdelld send. „Gang Du vora, Du hosch de greaschde Schdiefel a“ hod oinr gsaid, als se mid am mords Schbieß vor ‘em wilda Viech gschdanda send, am Has.

Eifluss vo außa

Eroberonga, Kriag, Besadzer, Eiwanderer, Glauba, des elles hod sich allwei au en dr Schbroch niedrgschlaga – nix Neis ond ganz normal. Wer also said „Des isch des reachde Schwäbisch“, der sodd sich amoal ibrlega, ob er do wirglich Reachd hod. Jede Schbroch ändred sich mid dr Zeid ond de Lebensomschdänd, au onsr Dialegd isch schdändig em Wandel ondrworfa.

Kommentare

Anmelden um Kommentare zu schreiben

 

Neueste Kommentare

Mondaufgang
1 Tag 7 Stunden
Europas Zukunft gestalten – besser zusammen! …
5 Tage 8 Stunden
Tödlicher Unfall auf der A8 bei Adelsried
1 Woche 8 Stunden
Versteck beim Gewitter!
1 Woche 22 Stunden
Auf einem Bein
1 Woche 22 Stunden


X